ကုလသမဂ္ဂ အထွေထွေ အတွင်းရေးမှူးချုပ်သည် သူ၏ ၂၀၂၀ ခုနှစ် သြဂုတ်လ အထွေထွေညီလာခံသို့ တင်သွင်းသည့် အစီရင်ခံစာ တွင် ရိုဟင်ဂျာ မူစလင်များ နှင့် အခြားလူနည်းစုများ၏ လူ့အခွင့်အရေး အခြေအနေနှင့်ပတ်သက်၍ တင်ပြခဲ့သည်မှာ- “မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား၏ လုပ်ငန်းတိုးတက်မှုရှိနေစဉ် ဒေသတွင်းရှိ အဖွဲ့ဝင် နိုင်ငံများ ၏ ပူးပေါင်း ဆောင်ရွက်မှု အထူးသဖြင့် အထူး တလည် အရေးကြီး သည့် မြန်မာနိုင်ငံ၏ ပူးပေါင်း ဆောင်ရွက်မှု သည် သက်သေများ၊ နစ်နာသူ များနှင့် တွေ့ဆုံရန် အပြင် အခြား သတင်းအချက် အလက် ရရှိရာ ရင်းမြစ်များ ကို ရရှိရန် အတွက် အခရာ ကျမည် ဖြစ်ပါသည်။ ၎င်းအားဖြင့် ယန္တရားသည် မိမိ၏ လုပ်ပိုင်ခွင့်ကို ထိရောက်စွာ အကောင် အထည် ဖော်နိုင်စွမ်း မည်ဖြစ်သော ကြောင့် ၂၀၁၁ ခုနှစ်ကစ၍ မြန်မာနိုင်ငံ၌ ကျူးလွန် ခဲ့သည့် ကြီးလေး သော အပြည်ပြည် ဆိုင်ရာ ရာဇဝတ်မှု များအတွက် တာဝန်ခံမှုကို ဆောင်ရွက် ပေးနိုင်မည် ဖြစ်ပြီး အနာဂတ် ရာဇဝတ်မှု များကို ဟန့်တား ပေးနိုင်မည် ဖြစ်သည်။”
အထွေထွေ အတွင်းရေးမှူးချုပ် က ထပ်မံ ဖြည့်စွက် ၍ တင်ပြခဲ့သည်မှာ- “မြန်မာနိုင်ငံရှိ ရိုဟင်ဂျာ လူထုအပေါ် ကျူးလွန်သည့် ရာဇဝတ်မှုများ အပါအဝင် ကျူးလွန်သည့် ရာဇဝတ်မှုများအတွက် တာဝန်ခံမှု မှာ အလွန် ပဓာန ကျပါသည်၊ တာဝန်ခံမှု မရှိသည့် ငြိမ်းချမ်းရေး နှင့် အမျိုးသား ရင်ကြားစေ့ရေး အတွက် ကြိုးပမ်း အားထုတ်မှု များမှာ လျော့ပါး သွားပါလိမ့်မည်။” အထွေထွေ အတွင်းရေးမှူးချုပ် သည် မြန်မာနိုင်ငံ အပါအဝင် အဖွဲ့ဝင်နိုင်ငံ များအား ဤယန္တရား အပါအဝင် ရှိရင်းစွဲ တာဝန်ခံ မှုဆိုင်ရာ လုပ်ထုံး လုပ်နည်းများ နှင့်အညီ အပြည့်အဝ ပူးပေါင်း ဆောင်ရွက် ပေးကြရန် တောင်းဆို လိုက်ပါသည်။
အထွေထွေ အတွင်းရေးမှူးချုပ်သည် သူ၏ ၂၀၂၁ ခုနှစ် မတ်လ လုံခြုံရေးကောင်စီ သို့ တင်သွင်း သည့် အစီရင်ခံစာ တွင် လိင်ဆိုင်ရာ အကြမ်းဖက်မှု နှင့် ဆက်စပ်သည့် ပြဿနာ နှင့် ပတ်သက်၍ “ချက်ချင်း၊ အပြည့်အဝ၊ ကန့်သတ်ချက်မရှိ၊ စောင့်ကြပ်ကြည့်ရှုခြင်းမရှိဘဲ၊ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား အပါအဝင်၊ မြန်မာနိုင်ငံ နယ်နိမိတ်အတွင်း ဝင်ရောက်ခွင့်” ကို တောင်းဆိုလိုက်ပါသည်။
မြန်မာနိုင်ငံတွင်းရှိ ရိုဟင်ဂျာ မွတ်စလင်များနှင့် တခြား လူနည်းစုများ၏ လူ့အခွင့်အရေး အခြေအနေနှင့် ပတ်သက်ပြီး ၂၀၂၁ ခုနှင် သြဂုတ်လတွင် ကုလသမဂ္ဂ အထွေထွေညီလာခံသို့ တင်ပြသည့် အစီရင်ခံစာတွင် ကုလသမဂ္ဂ အတွင်းရေးမှုးချုပ်က “ယခု အစီရင်ခံစာတွင် အကြုံးဝင်သည့် ကာလအတွင်းတွင် လူ့အခွင့်အရေး ချိုးဖောက်မှုများ အပါအဝင် ကြီးလေးသည့် အပြည်ပြည်ဆိုင်ရာ ရာဇဝတ်မှုများ၊ အပြည်ပြည်ဆိုင်ရာ ဥပဒေ ချိုးဖောက်မှုများကြောင့် နစ်နာခဲ့သူများအတွက် တစုံတရာ ပြန်လည်ဆောင်ရွက်ပေးရေးအပြင် ဥပဒေချိုးဖောက်သူများအား အရေးမယူနိုင်သည့် အခြေအနေမျိုးကို အဆုံးသတ်ဖို့ ကြိုးပမ်းလုပ်ဆောင်ရာတွင် တိုးတက်မှု အကန့်အသတ်သာ ရှိနေသည်။ နိုင်ငံတကာ အဖွဲ့အစည်းများနှင့် ပူးပေါင်းလုပ်ဆောင်မှု အပိုင်း အထူးသဖြင့် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား၊ မြန်မာနိုင်ငံတွင်း လူ့အခွင့်အရေး အခြေအနေများဆိုင်ရာ ကုလ အထူးကိုယ်စားလှယ်အဖွဲ့တို့နှင့် အနိမ့်ဆုံးအဆင့် ပူးပေါင်းဆောင်ရွက်မှုမျိုးသာ ရှိနေသည်။ ယနေ့ချိန်ထိ အဆိုပါ အဖွဲ့အစည်းနှစ်ခုစလုံးသည် မြန်မာနိုင်ငံတွင်းသို့ ဝင်ရောက်နိုင်ခြင်း မရှိသေးပါ” ဟု တင်ပြခဲ့သည်။
ကုလသမဂ္ဂအတွင်းရေးမှုးချုပ်က ဆက်လက်ပြီး “မြန်မာနိုင်ငံတွင် ရိုဟင်ဂျာများနှင့် လူနည်းစုများပေါ် ကျူးလွန်ခဲ့သည့် ကြီးလေးသည့် ရာဇဝတ်မှုများအတွက် တာဝန်ခံမှုရှိဖို့ မရှိမဖြစ် လိုအပ်သည်။ ဤအတွက် လွတ်လပ်သော မြန်မာနိုင်ငံဆိုင်ရာ စုံစမ်းစစ်ဆေးမှု ယန္တရားကဲ့သို့ သက်ဆိုင်ရာ အဖွဲ့အစည်းများသည် တရားမျှတမှု ဆောင်ကြဥ်းပေးရန်၊ အတိတ်က ကျူးလွန်ခဲ့သော ရာဇဝတ်မှုများအတွက် တာဝန်ခံမှု ရှိစေရန်၊ တရားလက်လွတ် သတ်ဖြတ်မှုများ ထပ်မံဖြစ်ပွားမှုကို ဟန့်တားရန် အထောက်အကူ ပြုနိုင်ပါသည်” ဟု ပြောကြားခဲ့သည်။ မြန်မာနိုင်ငံတွင်း ဝင်ရောက်ခွင့်ပြုမှု အပါအဝင် အဆိုပါ ယန္တရားများနှင့် အပြည့်အဝ ပူးပေါင်းလုပ်ဆောင်ရန်လည်း သူက တိုက်တွန်းခဲ့သည်။
ကုလသမဂ္ဂ အထွေထွေအတွင်းရေးမှူးချုပ်၏ သြဂုတ်လ ၂၀၂၃ ခုနှစ် အထွေထွေညီလာခံသို့ တင်သွင်းသည့် အစီရင်ခံစာ တွင် မြန်မာနိုင်ငံရှိ ရိုဟင်ဂျာမူစလင်များနှင့် အခြားလူနည်းစုများ၏ လူ့အခွင့်အရေး အခြေအနေ နှင့်ပတ်သက်၍ ဤသို့တင်ပြထားသည်။ “ယနေ့အချိန်ထိ ယန္တရားသည် မိတ်ဖက်အဖွဲ့အစည်းများနှင့် သတင်းရင်းမြစ်ပေါင်း ၇၀၀ ကျော်ဖြင့် ချိတ်ဆက်ဆောင်ရွက်လျှက်ရှိပါသည်။ ထို့အပြင် သက်သေထွက်ဆိုချက်များနှင့် စစ်ဆေးချက်မှတ်စုပေါင်း ၂၀၀ ကျော် အပါအဝင် သတင်းအချက်အလက် သန်းပေါင်းများစွာကိုလည်း စုဆောင်းစိစစ်ခဲ့ပါသည်။ ရိုဟင်ဂျာများအပေါ် ကျုးလွန်သော ရာဇ၀တ်မှုများနှင့် ပတ်သက်ပြီး ယန္တရားသည် အထောက်အထားဖိုင်တွဲများနှင့် စိစစ်သုံးသပ်ချက်စာတမ်းပေါင်း ၁၀၀ ကျော်ကို မျှဝေရန် အသင့်ပြင်ဆင်ထားပြီး ဖြစ်ပါသည်။”
မြန်မာနိုင်ငံအနေဖြင့် နိုင်ငံတွင်းဝင်ရောက်ခွင့်၊ မျက်မြင်သက်သေများ၊ ထိခိုက်နစ်နာသူများနှင့်တွေ့ဆုံခွင့်၊ မှုခင်းဖြစ်ပွားရာနေရာများသို့သွားရောက်ခွင့် စသည့် လုပ်ငန်းများတွင် ယန္တရားနှင့် အပြည့်အဝ ပူးပေါင်းဆောင်ရွက်ရန် အတွင်းရေးမှူးချုပ်က တိုက်တွန်းခဲ့သည်။ ထို့အပြင် အဖွဲ့ဝင်နိုင်ငံများ၊ အထူးသဖြင့် ဒေသတွင်းနိုင်ငံများကိုလည်း ၎င်းတို့၏ နယ်မြေအတွင်း ယန္တရား၏ လုပ်ငန်းများဆောင်ရွက်ရာတွင် လိုအပ်သည်များကို စီမံဆောင်ရွက်ပေးရန် အတွင်းရေးမှူးချုပ်မှ တောင်းဆိုခဲ့သည်။
Recent Comments