အထောက်အထားများ စုဆောင်းခြင်း၊ ထိန်းသိမ်းခြင်းနှင့် စိစစ်သုံးသပ်ခြင်း
အနာဂတ်တရားစီရင်မှုများကို အောင်မြင်စွာဆောင်ရွက်နိုင်ရေးသည် အထောက်အထားများမပျောက်ဆုံးမီ သို့မဟုတ် ဖျက်ဆီးမခံရမီ စုဆောင်းထိန်းသိမ်းထားနိုင်ခြင်း၊ အချက်အလက်များမဟောင်းသွားမီ သက်သေနှင့် အသက်ရှင်ကျန်ရစ်သူများ၏ထွက်ဆိုချက်များကို မှတ်တမ်းတင်နိုင်ခြင်းအပေါ်တွင် မူတည်ပါသည်။
ယန္တရားသည် အောက်ပါအထောက်အထားများကို စုဆောင်း၍ စိစစ်သုံးသပ်ပါသည်။
- အင်တာနက်ရင်းမြစ်များ၊ သတင်းများ၊ လူထုသတင်းပေးပို့မှုများနှင့် ဆိုရှယ်မီဒီယာအပါအဝင် ပွင့်လင်း ရင်းမြစ်များမှရသော အချက်အလက်များ
- ထိခိုက်နစ်နာသူများ၊ သက်သေများ၊ အခြားလူပုဂ္ဂိုလ်များနှင့် အင်တာဗျူးမေးမြန်းချက်များ
- စာရွက်စာတမ်းများ၊ ဓာတ်ပုံများ၊ ဗီဒီယိုများ၊ ဂြိုဟ်တုပုံရိပ်များနှင့် မှုခင်းဆေးပညာဆိုင်ရာအချက် အလက်များကဲ့သို့သော ရုပ်ပိုင်းဆိုင်ရာအထောက်အထားများ
- လူပုဂ္ဂိုလ်များ၊ စီးပွားရေးလုပ်ငန်းကြီးများနှင့် အကျိုးစီးပွားအုပ်စုများကြားရှိ ကွန်ရက်များနှင့် ချိတ်ဆက် မှုများ၊ လက်နက်အထောက်အပံ့ကွင်းဆက်များ၊ လယ်ယာမြေ၊ အိုးအိမ်နှင့် စီးပွားရေးလုပ်ငန်းများသိမ်း ယူခြင်းစသည့် ငွေကြေးဆိုင်ရာ အချက်အလက်များ။
မြန်မာနိုင်ငံဆိုင်ရာ လွတ်လပ်သော နိုင်ငံတကာအချက်အလက်ရှာဖွေရေးမစ်ရှင်မှ ရရှိသောအချက် အလက်များ
အရပ်ဘက်လူမှုအဖွဲ့အစည်းများနှင့် အစိုးရမဟုတ်သော အဖွဲ့အစည်းများထံမှ ရရှိသည့် အချက်အလက် နှင့် စာရွက်စာတမ်းများ။
အထောက်အထားများအား တရားရုံးတွင်တင်သွင်းနိုင်ရန်အတွက် အချက်အလက်၏တိကျခိုင်မာမှုကို ထိန်းထား ပြီး စိတ်ချရသော အဆင့်ဆင့်ထိန်းသိမ်းစောင့်ရှောက်မှုရှိစေရန် ခေတ်မီသော သတင်းအချက်အလက် စီမံခန့်ခွဲမှု စနစ်များကိုအသုံးပြု၍ လုံခြုံလျှို့ဝှက်စွာသိမ်းဆည်းထားသည်။
ယန္တရား၏ ရှေ့နေများ၊ စုံစမ်းစစ်ဆေးသူများ၊ စိစစ်သုံးသပ်သူများနှင့် ကျွမ်းကျင်ပညာရှင်များသည် ရရှိထားသည့် အချက်အလက်များကို ယုံကြည်စိတ်ချရစေရန်နှင့် တရားရုံးများတွင်အသုံးပြုနိုင်ရန် နောက်ဆုံးပေါ်နည်းပညာများနှင့် နည်းလမ်းများကိုအသုံးပြုပြီး စိစစ်သုံးသပ်ကာ အပြန်အလှန်တိုက်ဆိုင်စစ် ဆေးသည်။
ထို့နောက် ရာဇဝတ်မှုများအတွက် အဓိကတာဝန်ရှိသူများကို တရားစွဲဆိုသည့်အခါ ကူညီဆောင်ရွက်ရန် နိုင်ငံတွင်း၊ ဒေသတွင်းနှင့် နိုင်ငံတကာတရားရုံးများသို့ အထောက်အထားများနှင့် စိစစ်သုံးသပ်ချက်များကို မျှဝေသည်။
ယန္တရားသည် အမှီအခိုကင်းစွာနှင့် သမာသမတ်ကျစွာ ဆောင်ရွက်သည်။ စွပ်စွဲခံရသူများ၏ ပတ်သက်ဆက်နွယ်မှု သို့မဟုတ် ရာထူးအဆင့်အတန်းကိုမူတည်၍ ခွဲခြားဆက်ဆံခြင်းမပြုပါ။ ထို့အတူ ထိခိုက်နစ်နာသူများ၏ လူမျိုး၊ မျိုးနွယ်စု နှင့် ဘာသာရေးအုပ်စုများကို အခြေခံ၍လည်း ခွဲခြားဆက်ဆံခြင်းမပြုပါ။
လျှို့ဝှက်ပြီးအရေးကြီးသည့်အချက်အလက်များကို ယန္တရားထံ ဘယ်လိုပေးပို့ရမည်ကို လေ့လာပါ။
