တရားမဝင်အမိန့်ရရှိသူများ မိမိတို့ကို ဆက်သွယ်ပါရန် မြန်မာ့ယန္တရား (IIMM)မှ ပန်ကြားချက်။

၂၀၂၁ ခုနှစ်၊ မတ်လ ၁၇ ရက်နေ့

ယန္တရားအနေနှင့် ၂၀၂၁ ခုနှစ်၊ ဖေဖော်ဝါရီလက တပ်မတော် အာဏာသိမ်းမှုနှင့် ဆက်စပ်၍ ဖြစ်ပွားနေသော အဖြစ်အပျက်များကို အနီးကပ် စောင့်ကြည့်နေပြီး၊ စိတ်ထင်သလို ဖမ်းဆီးထောင်ချခြင်း၊ နှိပ်စက်ညှဉ်းပန်းခြင်း၊ အစဖျောက်ခြင်းနှင့် အာဏာသိမ်းမှုကို ငြိမ်းချမ်းစွာ ဆန္ဒပြသူများအား သေစေလောက်သော နည်းများနှင့် အပါအဝင်၊ အင်အားသုံးကာ ဖြိုခွဲခြင်း စသည်တို့နှင့် သက်ဆိုင်သော အထောက်အထားများကို စုဆောင်းလျက်ရှိပါသည်။

ယန္တရား၏ အကြီးအကဲဖြစ်သူ၊ နီကိုလတ်စ်ခွန်ဂျန်သည် လွန်ခဲ့သော အနှစ်(၂၀)အတွင်း အပြည်ပြည်ဆိုင်ရာ တရားရုံး (၇)ရုံးတွင် အလုပ်လုပ်ကိုင်ခဲ့ပြီး၊ လိုက်ဘေးရီးယားနိုင်ငံသမ္မတဖြစ်သူ ချားစ်တေလာနှင့် ခမာနီ (Khmer Rouge) ၏ ထိပ်သီးခေါင်းဆောင်များ ဖြစ်ကြသော Nuon Chea နှင့် Khieu Samphan တို့၏ ရုံးတင်စစ်ဆေးချက်များ အပါအဝင်၊ စသည့်အမှုတွဲများကို ကိုင်တွယ်ခဲ့သူဖြစ်သည်။ မစ္စတာခွန်ဂျန်က ပြောကြားသည်မှာ "အလေးနက်ဆုံး အပြည်ပြည်ဆိုင်ရာ ရာဇဝတ်မှုများအတွက် တာဝန်အရှိဆုံးဖြစ်သူများမှာ များသောအားဖြင့် ထိပ်သီးအာဏာပိုင်များ ဖြစ်ကြပါတယ်။ သူတို့က ရာဇဝတ်မှုတွေကို တိုက်ရိုက် လက်နှင့် ကျူးလွန်သူတွေမဟုတ်ကြဘဲ၊ ရာဇဝတ်မှုဖြစ်စဉ်နေရာတွေမှာ လူကိုယ်တိုင်တောင် ပါဝင်ရောက်ရှိနေကြသူတွေ မဟုတ်ပါဘူး။ သူတို့ရဲ့ တာဝန်ဝတ္တရားရှိကြောင်း သက်သေပြဖို့က လက်ခံရရှိခဲ့တဲ့ မှတ်တမ်းတွေ၊ ပေးခဲ့တဲ့ အမိန့်တွေနဲ့ မူဝါဒတွေကို ဘယ်လို ပြဌာန်းခဲ့သလဲ ဆိုတဲ့ အထောက်အထားတွေ လိုပါတယ်။ ဒါမျိုးတွေက များသောအားဖြင့် အနစ်နာခံရသူတွေမှ ပေးပို့နိုင်တဲ့ အထောက်အထားတွေ မဟုတ်တဲ့အတွက်၊ တရားမဝင်အမိန့်တွေနဲ့ မူဝါဒတွေကို လက်ခံရရှိခဲ့သူတွေ၊ သိတဲ့သူတွေက အမှန်တရားကို ဖော်ထုတ်ပြောဆိုဖို့ လိုပါတယ်။ ဒီလိုအချက်အလက် အကြောင်းအရာတွေကို သိရှိသူတွေက ယန္တရားသို့ ဆက်သွယ်ပေးပါရန် ကျွန်တော်ကိုယ်တိုင် အားပေးလိုပါတယ်။"

ယန္တရားကို အချက်အလက်ပေးပို့သူများသည် ထိုသို့လုပ်ဆောင်ရာတွင် လုံလုံခြုံခြုံဆောင်ရွက်ရန်နှင့် သတိဝီရိယကြီးမားစွာဖြင့် လုပ်ကိုင်ရန် အားပေးလိုပါသည်။ အောက်ပါ လုံခြုံသော ဆက်သွယ်ရေး လိုင်းများအား အသုံးပြုရန် ယန္တရားက အကြံပြုလိုပါသည်။ ဆစ်ဂနယ် (Signal) အပ်(app)ကို ဒေါင်းလုပ် လုပ်ပြီး၊ ယန္တရားထံသို့ ဖုန်းနံပါတ် +၄၁ ၇၆ ၆၉၁ ၁၂၀၈ အား မက်ဆေ့ခ်ျပို့ခြင်းဖြင့် လည်းကောင်း၊ သို့မဟုတ်၊ ပရိုတွန်မေး (Protonmail) ကို အသုံးပြုပြီး contact@myanmar-mechanism.org သို့ အီးမေးပို့ခြင်းဖြင့်လည်းကောင်း ဆက်သွယ်ပါ။  လူကြီးမင်းတို့၏ လုံခြုံရေးသည် ယန္တရားအတွက် အရေးအကြီးဆုံးသော အရာဖြစ်သောကြောင့်၊ ဘယ်အချိန်မဆို အချက်အလက်မျှဝေရန် လုံခြုံမှုမရှိဟု ယူဆလျှင်၊ မျှဝေခြင်းမလုပ်သေးဘဲ၊ လုံခြုံစိတ်ချရသည့်အချိန်မှသာ ဆက်သွယ်ရန် ပန်ကြားအပ်ပါသည်။ 

မြန်မာနိုင်ငံတွင်း ကျူးလွန်ခဲ့သော အကြီးလေးဆုံး အပြည်ပြည်ဆိုင်ရာ ရာဇဝတ်မှုများနှင့် နိုင်ငံတကာဥပဒေချိုးဖောက်မှုများ၏ သက်သေအထောက်အထားများအား စုဆောင်းရန် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရားကို ကုလသမဂ္ဂ လူ့အခွင့်အရေးကောင်စီက တည်ထောင်ခဲ့ပါသည်။ နိုင်ငံတွင်း၊ ဒေသတွင်းနှင့် အပြည်ပြည်ဆိုင်ရာ ခုံရုံးများတွင် ထိုရာဇဝတ်မှုများအတွက် တာဝန်ရှိသော လူပုဂ္ဂိုလ်များကို တာဝန်ခံစေနိုင်မည့် ရာဇဝတ်မှုတရားစီရင်ချက်များအား လွယ်ကူချောမွတ်စေရန် အထောက်အကူပြုနိုင်သော အမှုတွဲများကို ပြင်ဆင်ရန်လည်း ယန္တရားကို ဆက်လက် လုပ်ပိုင်ခွင့်ပေးအပ်ခဲ့သည်။