Select Page

အမှုတွဲများပြင်ဆင်ခြင်း

သက်ဆိုင်ရာ နိုင်ငံတွင်း၊ ဒေသတွင်းနှင့် အပြည်ပြည်ဆိုင်ရာ တရားစီရင်ရေး အာဏာပိုင်တို့နှင့် မျှဝေနိုင်ရန် အမှုတွဲများကို ယန္တရားက ပြုစုသွားပါမည်။ ဤသို့ဆောင်ရွက်နိုင်ရန်၊ စုံစမ်းစစ်ဆေးရေး၊ အချက်အလက်ရှာဖွေရေးနှင့် အစီရင်ခံစာတင်ပြရေးတို့ ပြုလုပ်နေသော လူပုဂ္ဂိုလ်တစ်ဦးချင်းစီ အပါအဝင်၊ တခြား အဖွဲ့အစည်းများထံမှ အထောက်အထားပစ္စည်းများကို ရနိုင်ရန် ကြိုးစားမည်။ မြန်မာနိုင်ငံဆိုင်ရာ လွတ်လပ်သော နိုင်ငံတကာ အချက်အလက်ရှာဖွေရေးမစ်ရှင် (FFM)ထံမှ လက်ခံရရှိထားသော အချက်အလက်ပစ္စည်းများအပေါ် အခြေခံကာ ယန္တရားက အမှုတွဲများကို ဆက်လက် ပြုစုသွားပါမည်။

ယန္တရားအနေဖြင့် အောက်ပါ ကိစ္စရပ်များကိုလည်း လုပ်ဆောင်သွားပါမည်။

  • အင်တာနက်၊ သတင်း၊ အစီရင်ခံစာများနှင့် လူမှုမီဒီယာတို့မှ အပါအဝင်၊ လူတိုင်း ရယူနိုင်သော သတင်း ရင်းမြစ်များမှ အချက်အလက်ပစ္စည်းများကို စုဆောင်းခြင်း၊
  • နစ်နာသူများ၊ သက်သေများနှင့် အခြားလူပုဂ္ဂိုလ်များအား အင်တာဗျူးမေးမြန်းခြင်း၊
  • ဗီဒီယို သို့မဟုတ် အသံ၊ ရုပ်မြင်သံကြား၊ ဒစ်ဂျစ်တယ်၊ အီလက်ထရောနစ်၊ ဂြိုလ်တုပုံရိပ်များဆိုင်ရာနှင့် မှုခင်းဆေးပညာဆိုင်ရာတို့ အပါအဝင်၊ ရုပ်ပိုင်းဆိုင်ရာ အထောက်အထားများကို ရယူခြင်းတို့ကို လုပ်ဆောင်သွားပါမည်။ သက်သေအထောက်အထားများ မှန်ကန်ပြည့်စုံကြောင်း၊ လုံခြုံမှုရှိကြောင်းနှင့် ၎င်းတို့ကို စနစ်တစ်ကျ ကွင်းဆက်မပျက် ထိန်းသိမ်းထားနိုင်ရန်အတွက်၊ ယန္တရားသည် စုဆောင်းရရှိထားသော အထောက်အထားပစ္စည်းများကို သင့်လျော်သော သတင်းအချက်အလက် စီမံခန့်ခွဲမှုစနစ်များနှင့် အသင့်သုံးနိုင်သော အီလက်ထရွန်နစ် အချက်အလက်သိုလောင်စနစ်များကို အသုံးပြုပြီး ထိန်းသိမ်းခြင်းနှင့် ပေါင်းစပ်ခြင်းများ လုပ်ဆောင်သွားမည် ဖြစ်သည်။

အထောက်အထားများ၏ သမာဓိနှင့် လုံခြုံမှုတို့ကို ဆက်လက်ထိန်းသိမ်းထားနိုင်ရန်နှင့် လိုအပ်သော အဆင့်ဆင့် ထိန်းသိမ်းစောင့်ရှောက်မှုတို့ ရှိစေရန်အတွက်၊ သင့်လျော်သည့် နည်းပညာစီမံခန့်ခွဲမှုဆိုင်ရာ ကိရိယာများနှင့် အီလက်ထရောနစ် ဒေတာဘေ့စ် (အချက်အလက်စုဆောင်းရာဘဏ်)များကို အသုံးပြုကာ၊ စုဆောင်းပြီးသော ပစ္စည်းများကို ပေါင်းစည်း၍ ထိန်းသိမ်းထားပါမည်။

ထို့နောက်၊ သက်ဆိုင်ရာ နိုင်ငံတွင်းနှင့် နိုင်ငံတကာ တရားစနစ်များတွင် အသုံးပြုသော အထောက်အထားဆိုင်ရာ၊ လုပ်ထုံးလုပ်နည်းများဆိုင်ရာ စံချိန်များနှင့် အခြေခံမူများကို ထည့်သွင်းစဉ်းစားပြီး၊ စုဆောင်းပြီးသော ပစ္စည်းများကို ၎င်းတို့၏ ယုံကြည်စိတ်ချရမှုနှင့် သက်သေပြနိုင်မှုတို့အ‌ပေါ်အခြေခံကာ စိစစ်သုံးသပ်သွားပါမည်။ ယန္တရားလက်တွင်းရှိ အချက်အလက်၊ စာရွက်စာတမ်းနှင့် အထောက်အထားတို့၏ ကွာဟချက်များကိုလည်း ထုတ်ဖော်သွားမည်ဖြစ်ပြီး၊ အထောက်အထား အပိုဆောင်းများကိုလည်း လိုအပ်သလို ရယူသွားပါမည်။

ဤသို့စိစစ်သုံးသပ်ချက်အပေါ်မူတည်၍၊ (၂၀၁၁)ခုနှစ်မှစပြီး လေးနက်သော အပြည်ပြည်ဆိုင်ရာ ရာဇဝတ်မှုများနှင့် နိုင်ငံတကာဥပဒေ ချိုးဖောက်မှုများကို မြန်မာနိုင်ငံတွင်း ကျူးလွန်ခဲ့သည်ဆိုသော လူပုဂ္ဂိုလ်များအတွက် အမှုတွဲများကို ယန္တရားက ပြင်ဆင်သွားပါမည်။ ထိုသို့ဆောင်ရွက်ရာတွင် ယန္တရားက သီးသန့်လွတ်လပ်ပြီး ဘက်မလိုက်စွာ လှုပ်ရှားသွားမည်ဖြစ်ပြီး၊ ပြစ်မှုကျူးလွန်သူများဟု စွပ်စွဲခံရသူတို့၏ ဆက်နွယ်မှု သို့မဟုတ်၊ တရားဝင်ရာထူးတို့အပေါ် မူတည်ကာ ခွဲခြားမှုများ ပြုလုပ်သွားမည် မဟုတ်ပါ။ မိမိတို့ ပြင်ဆင်သော အမှုတွဲများက မြန်မာနိုင်ငံရှိ လူမျိုး၊ မျိုးနွယ်စုနှင့် ဘာသာဝင်အုပ်စုမျိုးစုံတို့အပေါ် ကျူးလွန်သော ရာဇဝတ်မှုများ၏ အတိုင်းအတာ သို့မဟုတ်၊ လေးနက်ချက်တို့ကို ကိုယ်စားပြုစေရန် အတွက်လည်း ယန္တရားက ကြိုးစားသွားပါမည်။ ယန္တရား၏ စည်းမျဉ်းစည်းကမ်းများနှင့် လုပ်ထုံးလုပ်နည်းများ၊ ကုလသမဂ္ဂအမိန့်စာတမ်း၊ ကုလ၏ စည်းမျဉ်းစည်းကမ်းများ၊ မူဝါဒများနှင့် အလေ့အကျင့်ကောင်းများ၊ သက်ဆိုင်သော အပြည်ပြည်ဆိုင်ရာဥပဒေနှင့် တရားစီရင်နိုင်ခွင့်၊ အထူးသဖြင့် နစ်နာသူများနှင့် မျက်မြင်သက်သေတို့၏ လုံခြုံရေးနှင့် ချမ်းသာသုခကို ကာကွယ်သည့်၊ မျှတသော ရုံးတင်စစ်ဆေးချက်ရပိုင်ခွင့်နှင့် တခြား တရား​ဥပ​ဒေအရ ပြဋ္ဌာန်းချက်များနှင့်အညီ၊ ထိုလှုပ်ရှားမှုများကို လုပ်ဆောင်သွားမည်ဖြစ်သည်။ သေဒဏ်ချမှတ်နိုင်သော သို့မဟုတ် သေဒဏ်ပေးနိုင်သော ရာဇဝတ်မှုစီရင်ချက်များနှင့် အချက်အလက်၊ စာရွက်စာတမ်းနှင့် အထောက်အထားများကို ယန္တရားက ဝေမျှသွားမည် မဟုတ်ပေ။