Select Page

ပူးပေါင်းဆောင်ရွက်ခြင်း

ယန္တရား၏ ကိုယ်စားလှယ်အဖွဲ့ မလေးရှားနိုင်ငံခြားရေး၀န်ကြီး နှင့် ၂၀၁၉ ခုနှစ် ဒီဇင်ဘာလတွင် တွေ့ဆုံစဥ် (မလေးရှား နိုင်ငံခြားရေး ၀န်ကြီးဌာန)

ယန္တရားသည် မိမိတို့၏ လုပ်ပိုင်ခွင့်ကို အကောင်အထည်ဖော်နိုင်ရန်၊ သက်ဆိုင်သော ကုလသမဂ္ဂ အဖွဲ့ဝင်နိုင်ငံတို့၏ စိုးရိမ်ပူပန်မှုများနှင့် ထိရှလွယ်သော ကိစ္စများကို ထည့်သွင်းစဉ်းစားကာ၊ ၎င်းနိုင်ငံတို့၏ နယ်မြေအတွင်း လုပ်ငန်းများ ဝင်ရောက် ဆောင်ရွက်နိုင်ခွင့် သဘောတူညီချက်ကို ရယူရန်လိုပါသည်။ သက်ဆိုင်ရာ အဖွဲ့ဝင်နိုင်ငံများ၏ ပူးပေါင်းဆောင်ရွက်မှု မရှိပါက၊ ယန္တရား၏ လုပ်ပိုင်ခွင့်ကို အကောင်အထည်ဖော်ရန် လိုအပ်သည့် အချက်အလက်၊ စာရွက်စာတမ်းနှင့် အထောက်အထားများကို အပြည့်အဝ လက်လှမ်းမီနိုင်မည် မဟုတ်ပါ။

ယန္တရားသည် သက်ဆိုင်ရာ နစ်နာသူများ၊ မျက်မြင်သက်သေများနှင့် အထောက်အထားများရှိရာ အဖွဲ့ဝင်နိုင်ငံများနှင့် ပူးပေါင်းဆောင်ရွက်မှုများ ရနိုင်ရန် အားထုတ်သွားမည်ဖြစ်ပြီး၊ ယန္တရား၏လုပ်ပိုင်ခွင့်၊ ၎င်းတို့၏နယ်မြေအတွင်း မိမိတို့ကဆောင်ရွက်မည့် လှုပ်ရှားမှုများ၏ သဘောသဘာဝနှင့် ၎င်းတို့၏ ပူးပေါင်းဆောင်ရွက်မှုက မိမိတို့လုပ်ငန်းအတွက် အရေးပါကြောင်း စသည်တို့ကို နားလည်စေရန်၊ အစိုးရများနှင့် အဆင့်ဆင့် ထိတွေ့ဆက်ဆံသွားပါမည်။

တာဝန်ခံမှုရှိစေရန် ယန္တရား၏ ကြိုးပမ်းမှုများအတွက် အထူးအရေးပါသော ပူးပေါင်းဆောင်ရွက်မှု နောက်တစ်မျိုးမှာ မိမိတို့၏ လုပ်ပိုင်ခွင့်လက်အောက်ရှိ ပြစ်မှုများအတွက် လက်ရှိတွင် တရားစီရင်ခွင့်ရှိသော၊ သို့မဟုတ် အနာဂတ်တွင် တရားစီရင်ခွင့်ရှိလာနိုင်သော၊ နိုင်ငံတွင်း၊ ဒေသတွင်း နှင့် အပြည်ပြည်ဆိုင်ရာတရားရုံးများ၊ သို့မဟုတ် ခုံရုံးများနှင့် ဖြစ်ပါသည်။ ထိုသို့သော တရားရုံးများ၊ သို့မဟုတ် ခုံရုံးများသည် ယန္တရားက စုဆောင်းထားသော အထောက်အထားများကို အသုံးပြုရန် ဆန္ဒရှိပြီး၊ အသုံးပြုနိုင်ရပါမည်။ ယန္တရားကိုယ်တိုင်က အမှုများကို တရားစွဲဆိုနိုင်ခွင့်နှင့် တရားစီရင်နိုင်ခွင့် မရှိသည့်အတွက်၊ (၂၀၁၁)ခုနှစ်မှစ၍ လေးနက်သော အပြည်ပြည်ဆိုင်ရာ ရာဇဝတ်မှုများနှင့် နိုင်ငံတကာဥပဒေ ချိုးဖောက်မှုများကို မြန်မာနိုင်ငံတွင်း ပြစ်မှုကျူးလွန်သူတို့အား တာဝန်ခံမှုရှိစေရန်နှင့် နစ်နာသူများအတွက် တရားမျှတမှု ရှိစေရန်အတွက် သင့်လျော်သော တရားစီရင်ရေးအဖွဲ့များ မရှိမဖြစ်လိုအပ်ပါသည်။

အဖွဲ့ဝင်နိုင်ငံများ၏ ပူးပေါင်းဆောင်ရွက်မှုက အထူးအရေးပါသော တခြားကဏ္ဍများမှာ မျက်မြင်သက်သေများအား အကာအကွယ်ပေးရေးနှင့်၊ ယန္တရားနှင့်၎င်း၏ အဓိက ပရိသတ်မျိုးစုံကြား ကွာဟနေသည့် ဆက်ဆံရေး လမ်းကြောင်းကို ဆက်သွယ်ပေးမည့် အများပြည်သူသို့ ကမ်းလင့်ဆက်သွယ်ရေးလုပ်ငန်းများအတွက် အကူအညီပေးရေးတို့ပင် ဖြစ်သည်။